احتلوا بلدي وخطفوني وطردوني من المدرسة وقتلوا صديقي وبعديين

تعرفون صديقي عمر مات بتفجيرات الصالحية ، جان وياي بنفس المدرسة ، وابوه صديق ابويه ، واخواته صديقات اخواتي ، وبعدين اني سافرت وي اهلي وهو بقه بالعراق ، ابويه جابلي تلفونه وحجيت وياه قبل شهرين ، وبقه يرسلي صور ورسائل على الاميل مالتي ، لما صار التفجير ابوية كال هذا التفجير يم بيت عمر وخابر ابوه لكن ابوه ما رد على التلفون بعدين عرفنه انه عمر مات ، ما اعرف شتريد امريكا من العراق وشتريد ايران من العراق ، ابويه يكول العراق دمرته امريكا وكملت عليه ايران ، ويكول ان المالكي وجماعته ما يحبون العراق ويحبون الكراسي مالتهم ، عمري بس ثمانية سنوات لكن اشعر اني كبرت هواي ، خطفوني جيش المهدي وابوية باع ذهب امي وسيارته علمود يطلعني وجيت للمغرب طردوني من المدرسة لان اسمي عمر وهسه كتلوا صديقي ، زين وين اروح ، والله تعبت ، اشوف الناس على تلفزيون الشرقية يبجون ، وامي تبجي وابويه ضايج ، همو المذيع بالشرقية يكول ان الحكومة يتعاركون بيناتهم ، ولما سألت ابويه ليش يتعاركون كلي تعاركون منو يذبح اكثر بالعراقيين ، اني احب عمر صديقي والله احبه لان هو حباب ومن سافرت انطاني الطوبة مالته وجان يطلع الاول على الصف ليش يموت وهو صغير ، يكولون خاله ام عمر همه مجروحه الله يشافيها بس امي تكول شلها بحياتها بعد ابنها ، الله يرحم موري اخويه وينتقم من الي قتله والله يشافي خاله ام عمر امين

mailto:*omeralarab2000@gmail.com